احلي نصائح نانيس لربطات الحجاب

النهارده هنشوف مجموعة متنوعة من لفات الطرح الجديدة، بس قبل ما نشوف المجموعة المختلفة دي هنتكلم في الأول عن شوية حاجات بسيطة ممكن تساعد أي بنت محجبة على اختيار الطرحة، أو الإيشارب بطريقة صح...

قبل ما تشتري فكري

علشان البنت تشتري طرحة كويسة يبقى لازم قبل ما تنزل تشتري تفكر وتعرف هي ناقصها إيه في الدولاب؟!..علشان كده بقول لكل بنت افتحي دولابك وشوفي عندك كام بادي وكام تي شيرت وكام بنطلون وإيه هي الألوان اللي أنت محتاجة لها، علشان لما تشتري تكون الحاجة اللي هتشتريها مناسبة للون اللبس اللي عندك....كمان لازم يكون في دولابك ألوان أساسية زي الأبيض والبني والرمادي والأسود والبيج لأن الألوان دي بتليق على كل اللبس.

كمان لو مش عارفة تجيبي نفس درجة اللون أو الخامة اللي أنت عايزاها يبقى لازم تلفي على أكتر من محل لغاية ما تلاقي اللي أنت عايزاه.

اختاري اللون المناسب لبشرتك

هنتكلم دلوقتي عن إزاي البنت تختار لون الطرح المناسبة للون بشرتها ودي المرحلة التالية بعد ما البنت تحدد اللي محتاجة له.. وفيه حاجة لازم ألفت نظرك إليها، وهي إنك ما تحطيش ماكياج صارخ وأنت نازلة تشتري الطرح علشان تقدري تختاري الطرح المناسبة ليكي، وكفاية إنك تكوني حاطة ماكياج خفيف، كمان حاولي تلبسي ألوان سادة وأنت رايحة تشتري الطرح أو الإيشاربات علشان تقدري تختاري اللي أنت عايزاه، وياريت بعد ما تختاري الخامة واللون اللي أنت عايزاه تحطي الإيشارب على وشك وتقفي قدام مرايات المحل وتشوفي إذا كان اللون مناسب للون بشرتك فعلا ولا لأ؟!

وبصفة خاصة بنلاقي...

إن أصحاب البشرة الخمرية بيليق عليهم الألوان الفاتحة والغامقة والوسط...

لكن البنات أصحاب البشرة البيضاء بيليق عليهم الألوان الغامقة زي الأسود والكحلي والأخضر والأحمر الغامق والذهبي الغامق... وطبعا مش بيليق عليهم الألوان الفاتحة زي الأبيض أو الأصفر الفاتح أو الرمادي الفاتح نهائي، لأن الألوان دي بتخلي الوش كله يبان كأنه شاحب، علشان كده بنلاقي إن البنات اللي بتلبس إيشاربات ألوانها فاتحة وبشرتها بيضاء بيحتاجوا يحطوا ماكياج كتير علشان بشرتهم ماتبانش مجهدة وشاحبة...

أما البنات أصحاب البشرة السمراء أو الداكنة فالحاجة المناسبة لهم هي الإيشاربات الفاتحة طبعا زي "الموف الفاتح"و"التركواز" و"الفوشيا" و"الأخضر الفاتح" ويفضل طبعا إنهم يحطوا ماكياج خفيف وما يحاولوش يفتحوا لون بشرتهم ويقتنعوا إن البشرة السمراء دي ميزة لأنها مابتعجزش بسرعة وما بيبانش فيها أي تجاعيد بسرعة.

السعر على حسب الخامة

كل خامة في الإيشاربات ولها ثمن محدد ومعروف، يعني مثلا ما ينفعش حد يقول لك إن القطن اللي فيه تطريز بأقل من 50 أو 60 جنيه وعلى فكرة القطن السادة بيبدأ من10 جنيه وبيوصل لغاية 30 جنيه، أما الشيفون فبيبدأ من 20 أو 30 أو 40 جنيه، ده في حالة لو فيه تطريز خفيف مش كتير، أما الطرح المكشكشة فدي بتكون في حدود 15 أو 20 جنيه بالكتير جدا ممكن توصل إلى 25 لو فيها تطريز، كمان التول مش غالي خالص فالمتر سعره حوالي 25 جنيه وسعر الطرحة الواحدة حوالي 5 جنيه، لكن الستان هو اللي بيبقى غالي شوية، هو والحرير. وفيه حرير بيوصل لـ90 أو 120 جنيه، وده ممكن تلاقيه في المحلات الكبيرة والمولات زي "جنينة مول" و"سيتي سنتر" و"سيتي ستارز".

أما بالنسبة للطرح اللي بتتلبس من تحت الطرح فبتكون أرخص بكتير من الإيشارب الأساسي، فممكن البندانة تبقى بـ2 أو 3 جنيه، وفيه حاجات كبيرة شوية بتوصل إلى 6 جنيه، وفيه أشكال كتيرة منها الشكل السوري والتركي والمصري، وعلى فكرة تمن الإيشارب الكبير بيبقى أغلى من البونيهات أو البندانات...

الجديد في عالم الإيشاربات

أحب أقول لكم على حاجة إن مابقاش فيه حاجة اسمها طرحة خامتها جديدة، وطرحة خامتها قديمة، فيه حاجة اسمها طرح عليها شكل جديد أو تطريز جديد، لأن الخامات موجودة في كل الأوقات ومالهاش موضة محددة.

وممكن نقول إن الإيشاربات الستان المنقوشة هي أحدث حاجة نازلة في الإيشاربات، وعلى فكرة الإيشارب الستان ده بينفع لكل المناسبات والأوقات فممكن يتلبس الصبح، أو في السهرة، مش كده وبس ده مابقاش فيه حاجة اسمها إن الستان المنقوش يتلبس على الحاجات السادة فقط لأنه ممكن يتلبس على حاجة منقوشة وبيدي شكل في منتهى الشياكة.

وبالنسبة لألوان الإيشاربات اللي نازلة موضة في صيف 2009 بتلاقي إن التركواز والأصفر والموف الفاتح والأحمر والأخضر والأزرق والبرتقالي وكل الألوان الطبيعية هي الموضة.

كمان لازم تجربي الإيشارب على نفسك قبل ما تشتريه وتعرفي هتربطيه إزاي لأن ما ينفعش تختاري الإيشارب من بعيد وتاخديه، لازم تجربيه الأول وتشوفي شكله هيكون عامل إزاي؟! وياريت ما تجيبيش الطرح الكبيرة اللي مش هتعرفي تربطيها، خليكِ في الحجم الطبيعي اللي هو طرح طولها 120 سم وعرضها 40 سم..

لوكنت سنة أولى حجاب

دلوقتي عايزة أقول شوية نصائح للبنت اللي أول مرة تلبس حجاب.. وعلى فكرة النصائح دي برضه مفيدة لأي بنت محجبة...

-1-

ما تحاوليش تجيبي الطرح الصعبة زي الستان أو المكشكشة أو الحرير أو الطرح اللي فيها تطريز كتير لأن كل ما كانت الطرحة بسيطة وما فيهاش تطريز كتير هتكون أسهل في اللبس، وعلى فكرة القطن مناسب جدا هو والشيفون التقيل أسهل في الربط من أي طرحة تانية.

-2-

لو كنت بتشتكي إن الطرحة بتاخد منك وقت طويل في اللبس يبقى ممكن تلبسي بندانة قطن تحت الطرحة وده لأن البندانة هتساعدك إنك تربطي الطرحة بسرعة.
كمان خدي بالك إنك لو هتلبسي طرحة شفافة وهتبين شعرك من تحت يبقى المفروض تلبسي تحتها بونيه خفيف أو طرحة تانية قطن أو بندانة علشان تداري شعرك.

-3-

أنصح أي بنت لسه هتتحجب أو تلبس إيشارب جديد إنها تاخد بالها من لبسها لأن اللبس عليه عامل مهم جدا في اختيار الإيشارب، فمينفعش تلبسي ضيق من تحت وتكوني محجبة لأن بكده هتكوني منتقدة أوي، وياريت قبل ماتتحجبي تظبطي لبسك وتجيبي هدوم واسعة مناسبة للحجاب.

-4-

اوعي تلبسي طرح فيها تطريز وحاجات بتلمع كتير وأنت رايحة الجامعة أو الشغل الصبح، لأن ده شيء مرفوض تماما ومش مناسب للجامعة أو للشغل وبيقلل من شياكتك.

-5-

دلوقتي انتشرت الإسدالات السوداء. بصراحة أنا مش بفضل شكلها لأنها مابتديش شياكة، بالإضافة إلى إن الإسدال بيترب من الأطراف بسرعة. علشان كده بانصح البنات اللي عايزين يلبسوا لبس إسلامي واسع إنهم يلبسوا عبايات واسعة يكون فيها نفس مواصفات الإسدال، يعني ما تكونش ضيقة من عند الصدر أو الوسط ومش قصيرة، وأنا بفضل العبايات السعودية اللي شكل الفراشة لأنها بتكون ممسوكة من عند الأكمام وبتكون واسعة من عند الإيد.

-6-

لو كان وشك صغير ومش عارفة تربطي الطرحة إزاي؟! فقدامك أكتر من حل علشان وشك يبان من الطرحة...

أولا: ممكن تروحي عند أي مركز تجميل متخصص علشان يعمل لك عملية إزالة للشعر الموجود في منطقة القورة بالفتلة أو بالتشقير بحيث إن منطقة الجبهة تكبر شوية.

ثانيا: حطي ماكياج خفيف بحيث يفتح منطقة الجبهة.

ثالثا: ماتجيبيش طرح كبيرة لأن كل ما كانت الطرحة متوسطة الطول أو صغيرة شوية هتخلي وشك طبيعي، وياريت تلبسي طرح فاتحة علشان تكبر منطقة الوش شوية.

رابعا: حاولي تبعدي في اختيارك عن الطرح الخفيفة اللي بتتزحلق زي الستان والحرير والشيفون الخفيف خصوصا لو كنت هتلبسيهم من غير بندانة.

خامسا: ممكن تربطي الطرحة بالطريقة العادية أو تعمليها إسبانش، بس في الوقت ده بتبقى البندانة من تحت وتربطي الإيشارب من ورا بدبوس، وبعد كده بتلفي الإيشارب من وراء حوالين شعرك زي الشينيو أكتر من مرة علشان كل ما كانت الطرحة كبيرة من وراء وشكلها ضخم هتدي شياكة وأناقة وشكل حلو للبنت اللي وشها صغير وبيكون شكلها زي الإسبان.

-7-

لكن لو كان وشك كبير يبقى خدي بالك من شوية الحاجات دي وأنت بتلفي الطرحة...

أولا: إن الطرح الإسبانش اللي جاية لوراء مش مناسبة ليك نهائي، وأفضل لفة ليكي هي اللفة العادية أو إنك تعمليها إسبانش وتجيبي طرف من الطرحة للأمام علشان تداري الرقبة أو الغدد اللي بتكون موجودة تحت الرقبة، ودي حاجة بتشتكي منها بنات كتير.

ثانيا: حاولي تصغري وشك باستخدام الماكياج زي مثلا إنك تستخدمي الروجاجو البيج الغامق علشان تحاولي تصغري وشك شوية.

ثالثا: ياريت تختاري طرح سادة أو يكون طرفها هو اللي منقوش أو فيها تطريز بسيط وابعدي نهائي عن الطرح اللي فيها نقوش كبيرة واللي فيها تطريز كتير لأن كل ده بيشد النظر إلى وشك وبيبين حجمه.
ربطات للوش الصغير
موضوعات سابقة ارسل الموضوع لصديق

الربطات اللي هنشوفها دلوقتي مناسبة جدا لأصحاب الوش الصغير لأنها بتدي ضخامة للوش وبتكبره

الربطة الأولى

أول ربطة معانا النهارده ربطة بسيطة جدا تنفع للصبح، وهي عبارة عن إيشاربين قطن بلونين مختلفين ومناسبين لبعض ربطنا الأول إسبانش ربطة عادية خالص ومن فوقه الإيشارب التاني... وسيبنا الطرف الطويل على جنب، ولفينا الطرف القصر على الشعر من وراء والطرف الكبير ربطناه من على جنب بدبوس بطريقة بسيطة.

الربطة الثانية

في الربطة دي هنستخدم الطرحة الزيتي اللي استخدمناها في الربطة الأولى وبعد كده نحط عليها الأورنج ونخلي حتة من الزيتي تبان من الأمام ونربطها من وراء، هنمسك الطرف الطويل من الطرحة الزيتي ونجيبه إلى الأمام على الناحية التانية بحيث إننا نداري بيه الرقبة زي ما في الصورة كده








بعد كده بناخد الطرف الطويل للطرحة الأورنج ونلفه على الشعر من فوق زي ما أنا ماسكاها في الصورة كده وبنثبتها من على جنب باستخدام الدبابيس وعلى فكرة الطرحة الثانية في اللفة دي لازم يكون فيها شغل بسيط علشان يبان من على جنب.





ربطات للوش الكبير
الربطة الأولى

في الربطة دي هنستخدم اللون البيج اللي فيه لمعة بسيطة وعلى فكرة الربطة دي تنفع الصبح وبالليل لو عندك خروجة مهمة أو حفلة خطوبة. وعلى فكرة لون الإيشارب ده بيليق مع جميع ألوان البشرة.

هنربط الطرحة إسبانيش عادي وبعد كده ناخد جزء منها ونربطه من فوق زي الشينيو...




بعد كده نحط عليها الطرحة المنقوشة، هنمسك الطرحة المنقوشة ونربطها بحيث إننا نداري منطقة الرقبة، هناخد الجزء الصغير من الطرحة البيج اللي كان موجود عندنا في الخلف ونجيب جزء صغير من الطرحة المنقوشة ونربطهم مع بعض من على جنب على شكل وردة، وده عن طريق إننا نكشكشهم بالدبوس بالراحة.




على فكرة الربطة دي اسمها الربطة التركي ودي بتليق على الوش الطويل والجبهة الكبيرة.

الربطة الثانية

هنستخدم فيها برضه لونين؛ اللون الأول هو الأسود وهنربطه من الأمام بدبوس من تحت الرقبة، بعدين نربط عليها التركواز من الأمام برضه من تحت الرقبة، وناخد بالنا إننا نسيب حتة طويلة وحتة قصيرة في كل طرحة، ونحاول نبين الطرحة اللي لونها أسود من الأمام بحيث إنها تبان كأنها بندانة... بعد كده ناخد الطرف الكبير من الإيشارب الأسود ونلفه من فوق ونربطه من ناحية الشمال بدبوس علشان يعمل علو للطرحة وما تبقاش مبططة على الوش.


بعد كده بنلف الطرف الكبير من الإيشارب التركواز بنفس الطريقة اللي لفينا بيها الإيشارب الأسود وناخد بالنا إننا نبين جزء من الإيشارب الأسود من فوق زي ما موجود في الصورة...بعد كده بناخد الطرف القصير في الإيشارب الأسود والتركواز ونربطهم باستخدام الدبوس على شكل وردة من على جنب.