طرق المكرونة المختلفة

المكرونة بالباشاميل

الباشاميل له طرق كتير , انا ليا طريقه معينة يمكن هتلاقوها مختلفة عن اي مقادير تانيه , بس لو اتعملت زي ما انا قلت هتعجبكم اوي ..بالهنا و الشفا

المقادير

1 كيلو مكرونة ( مقصوصة)

نصف كيلو لحمة مفرومة

2 بصلة كبيرة مبشورة

4 معالق كبيرة سمنة او زيت
--
مقادير الباشاميل

كيلو و ربع لبن

5 معالق دقيق كبيرة

5 معالق كبيرة زبدة / أو سمن

2 بيضات

ربع كوب زيت

ملح / فلفل / بهارات حسب الطلب

الطريقة

نغلي مقدار ماء و نضيف اليه المكرونة و نصف معلقة زيت و نسيبها تستوي

نضع الزبدة او الزيت ( 4 معالق ) و نستنى الزيت يقدح و نضيف البصل المبشور و نقلبه لحد لما يبقى لونة اصفر فاتح و نضيف عليه ربع معلقة ملح .

بعد لما يبقا لونة دهبي نضيف اللحم المفروم مع التقليب و اضافة الفلفل و الملح و البهارات و نقلبها 5 دقايق و نضيف اليها ربع كوب ماء و نسيبها لحد لما تستوي و دايما بنتابعها و نقلبها من فترة للتانية عشان متتحرقش لحد لما تستوي

نيجي للباشاميل , نحط الزبدة و الدقيق على بعض و نضربهم بمضرب يدوي ., لحد لما يمتزج الخليط , و بعد كدا بنضيف اللبن البارد ( منغليش اللبن خالص )

نقلب الخليط دا كويس لحد لما يمتزج و نحطها على النار و نبدأ نقلبه على طول على النار الهادية لحد لما يكون القوام بتاعها كثيف , و منبطلش تقليب لأنها لو بطلنا هتعجن .

أهم خطو و احنا بنحط البيض , نكون مجهزين البيض من الأول – نضربه مع ملح و فلفل كويس , و أثناء ما احنا بنقلب الخليط على النار بيعد لما يكون قوامه كثيف , نضيف البيض مع استمرار التقليب السريع , ناخد بالنا أوي في الخطوة دي لأن البيض لو استوى يبقا الباشاميل هيبوظ .

نجيب صينية و ندهنها بزبدة او سمن , و نجيب المكرونة و نضيف لها تلت مقدار الباشاميل و نقلبة كويس و نحط نصفة في الصينية و نفرد بالتساوي

نحط فوقيه كمية اللحمة و نفردها على المكرونة , و بعد كدا نحط النص الباقي من فوق

نضيف باقي الباشاميل على الوش من فوق .

نجيب بيضه على ربع كوب الزيت و الملح و الفلفل و البهارات و نضربها كويس و نحطها على وش الباشاميل في الصينية و نفردها كويس

نحطها في الفرن على نار و نتركها من نصف ساعه ل 40 دقيقه و نتابعها لحد ما وش الباشانيل يكون لونه أحمر .




سباجتي بصوص البولونيز

طريقة حلوة للمكرونة و سهلة جدا

المقادير

نص كيلو سباجتي

نص كيلو لحم مفروم

بصلة كبيرة مبشورة

نص كوب زيت زيتون

5 حبات طماطم / كوب ماء ( عصير طماطم في الخلاط )

معلقتين صلصة طماطم ( بتدي طعم لذيذ)

معلقة ريحان

ملح و فلفل

جبن بارمزان مبشور

الطريقة

نسلق المكرونة في حلة كبيرة , نسخن الميه و اول ما تغلي نضيف لها المكرونة و نقطة زيت و نستنى انها تستوي و نطلعها و نصفيها

نحط الزيت في قلاية و نضيف البصل و نقليه لحد لما يدبل ( البصل بيكرمش و الحواف بتاعته بتلف لجوه و لونه بيكون ابيض معكر )

نضيف اللحم المفروم و نشوحه مع البصل و اول ما يبدأ ينزل الميه بتاعته تضيف له عصير الطمامطم و الريحان و الملح و الفلفل و صلصة الطماطم

نخليه على النار و أول ما تتسبك الصلصة ( بتعمل فقاقيع صغيرة على الوش و الصلصة بيكون لونها غامق ) نوطي عليها النار لحد لما تتشرب كل الميه بتاعتها (بس ناخد بالنا انها متتحرقش)

لما تشرب الميه كلها منها .. نضيفها على المكرونه و نضيف على الوش الجبنة و ممكن عودين كرفس و فلفل اخصر و قطع زيتون و مايونيز




الكاربونارا ( مكرونة سباجتي بالصوص الأبيض و اللحم و المشروم

الكاربونارا اكلة معرفوة و ايطالية , شوفتها هنا كتير في مصر بيضيفوا لها كريمة أو لبن و دا مش صح , انا هقولكم طريقة لذيذة و خفيفة و نتيجتها حلوة جدا

المقادير :

نصف كيلو لحم / مقطع قطع صغيرة

كيلو مكرونة سباجتي

2 كوب مشروم (ممكن نزود الكمية حسب الطلب)

7 بيضات

2 كوب جبنة بارميزان

ملح / فلفل

معلقة زبدة


الطريقة

نحط القلاية على نار متوسطة و نحط الزبدة , و اول ما تسيح نحط عليها اللحمة المقطعة . نوطي النار شوية و نغطيها .. لحد لما تنزل جزء من المية بتاعتها و تبقى هشة و مستساغة .

نطلع اللحمة و نحطها على جنب و في نفس القلاية نحط المشروم , نقلبه في الصوص بتاع اللحمة اللي في القلاية دقيقة او اتنين و نضيف نص كوباية ميه , و نسيبه على النار لحد لما المشروم يستوي و كل الميه تتبخر ( المشروم هيكون لونة بني شوية )

وقت ما المشروم يكون بيستوى , نبدأ نغلي ميه للمكرونة , و نحط المكرونة عشان تغلي , و نضيف الملح و الفلفل و قبل ما المكرونة تكون استوت نبدأ نحضر الصوص بتاع الكاربونارا

نكسر البيض و نضربه مع الجبنة البارميزان كويس , و نضيف الفلفل عشان البيض طعمه ميغيرش , البض لازم يتضرب كويس جدا مع الجبنة و يكون ممتزج تماما .

دلوقتي أهم خطوة عشان نجاح الكاربونارا , اول ما المكرونة تستوي نطلعها عشان نصفيها من الميه - بس مش بنغسلها عشان متبردش , و نحافظ على شوية ميه على جنب عشان لو احتجناها للصوص

نرجع المكرونة تاني لنفس الحلة اللي سلقناها فيها , بس مش على النار طبعا – و نضيف المشروم و اللحمة و الصوص , و نبدأ في التقليب على طول

المفروض الحرارة اللي في المكرونة و في الحلة هيعملوا الصوص بتاع الكاربونارا . ناخد بالنا اننا بنقلب بسرعه جدا قبل ما الحلة أو المكرونة تبرد ( عشان كدا قلنا لازم الصوص يكون جاهز من الأول قبل ما المكرونة تستوي )

لازم نقلب على طول لحد ما الصوص يتحول لشكل كريمة و تغطي المكرونة , لو مقلبناش بسرعه البض هيبوظ و يتسلق و يعجن طبعا .

لو لقينا الصوص تقيل ممكن نضيف جزء من الميه اللي شلناها على جنب

اول ما نخلصها بتتقدم سخنه و ممكن نضيفلها فلفل اسود و ملح لو احتاجت طبعا

فيه اضافات كويسة – ممكن في خطوة المشروم لما بنسوية نضيف خلقات صغيرة من الفلفل الأحمر , و ممكن كمان نص حبة طماطم مقطعة صغير جدا , اللون الأحمر بيدي شكل حلو

ممكن نزينها بالريحان او الكرفس الأخضر


مكرونة بالجمبري

المقادير

نص كيلو مكرونة ( أي نوع مكرونة مفضلة )

نص كيلو جمبري وسط

4 فصوص ثوم

بصله مبشورة

5 حبات طماطم / كوب ماء ( صلصة في الخلاط)

نص معلقة صلصة

3 معالق كبيرة زيت زيتون

معلقة ليمون / أو خل

معلقة فلفل حار (شطة)

ملح / فلفل

فلفل رومي مقطع حلقات / كرفس / بقدونس ( للتجميل )


الطريقة

نغسل الجمبري كويس جدا , و بعد كدا نقشرة . و نرجع نغسلة كويس أوي و ننقعه في ليمون و ملح و فلفل على جنب

نسلق المكرونة و نجهزها و نحطها على جنب

نحط الزيت في قلاية على النار , و نحط البصل عليه و الثوم و نقلب كويس لحد لما يحمر البصل

نضيف الجمبري و بالتتبيلة بتاعته , و نقلب باستمرار

لما يبقا نص سوا تقريبا ( 5 دقايق) نضيف الصلصة و نسيبها لما تتسبك

بنعرف انها اتسبكت لما نلاقيها بتطلع فقاقيع صغيرة و نلاقي لونها اصبح احمر غامق

(( لو مش عاوزين صلصة .. بنضيف مع الجمبري مشروم و نقلب لحد لما يستوي ))

بعد لما تتسبك الصلصة قددامنا اختيارين

1 - نغرف المكرونة و نضيف عليها الصوص من فوق فقط

2 - نضيف المكرونة للصلصة و الجمبري و نسيبها على النار 5 دقايق مع التقليب و بعد كدا نغرفها

للتجميل نحط حلقات الفلفل الرومي و البقدونس و ممكن اي تاضافات نحبها .. بالهنا و الشفا :)