أطباق جديدة

أنواع مختلفة من الأطباق البسيطة والسهلة واللي ممكن نعملها الصبح علشان نفطر بيها قبل ما نخرج نروح الشغل أو المدرسة أو الجامعة، أو نعملها وناخدها معانا ونفطر بيها هناك؛ لأن زي ما كلنا عارفين إن وجبة الفطار ضرورية جداً علشان نقدر أننا نكمل اليوم...

وعلى فكرة الأطباقدي كلها قيمة غذائية عالية ومفيدة جداً للجسم.

البيض المسلوق بالمايونيز



المقادير:
• بيضة مسلوقة.
• شرائح جبنة "كرفت" أو "شيدر مبشور".
• معلقة مايونيز.
• فلفل أسود وملح.
• توست.

الطريقة:
- هندهن وش التوست بشوية مايونيز وهنقطع البيضة المسلوقة إلى شرائح ونوزعها على التوست ونرش عليها شوية ملح وفلفل.

- هنحط فوق كل شريحة توست جبن كرافت أو شيدر وبعد كده هندخل التوست إلى الميكرويف لمدة ربع ساعة وبعد كده نطلعه.

وبألف هنا وشفا

الأومليت بالجبنة واللبن



المقادير:
• 2 بيضة.
• 1 ملعقة صغيرة زبدة.
• 2 ملعقة كبيرة لبن.
• شريحة جبن شيدر مقطعة مكعبات صغيرة.
• ملح وفلفل.
• عيش فينو أو شامي.

الطريقة:
- هنخفق البيض بالملح والفلفل ونضيف إليه اللبن.

- هنسخن طاسة صغيرة على النار ونضيف إليها الزبدة وبعد كده نضيف إليها البيض المخفوق باللبن ونهز الطاسة علشان البيض يغطي قاع الطاسة.

- هنجيب مكعبات الجبنة ونحطها في وسط قرص البيض... وهنسيب قرص الأومليت لمدة دقيقتين علشان ظهره يحمر وبعد كده نطويه بالشوكة وبعد كده نقلبه على الناحية التانية.

- بعد ما الأومليت يستوي نحطه بالراحة في طبق التقديم وناكله بالعيش البلدي أو نعمله سندويتشات.

وبألف هنا وشفا

شكشوكة



المقادير:
• 2بيضة.
• بصلة مقطعة قطع صغيرة.
• طماطم مقطعة قطع صغيرة.
• فلفل أسود .
• ملح.

الطريقة:
- هنحمر البصلة على النار لغاية ما لونها يبقى ذهبي وبعد كده نضيف إليها الطماطم المقطعة ونسيبها على النار لمدة 5 دقائق.

- بعد كده هنضيف إليها البيض المخفوق بالملح والفلفل ونسيبهم على النار لمدة 5 دقائق مع استمرار التقليب لغاية ما البيض يستوي.


وبألف هنا وشفا

بطاطس بانيه




المقادير:
• نصف كيلو بطاطس.
• بقدونس مفروم.
• ملح وتوابل.
• بيض.
• بقسماط .
• زيت للتحمير .

الطريقة:
- هنسلق البطاطس كويس ونخلطها مع البقدونس المفروم ونضيف إليهم الملح والبهارات ونقلبهم مع بعض كويس..

- هنشكل البطاطس المفرومة على شكل صوابع عريضة وبعد كده نحطها فى البيض وبعد كده البقسماط وبعد كده نحمرها في الزيت ونحطها في السندويتشات.


وبألف هنا وشفا

فطيرة بجوز الهند



دي فطيرة حلوة ممكن إننا نعلمها بنفسنا ونفطر بيها الصبح ومقاديرها بسيطة جداً..

مقادير الفطيرة:
• 2 كوب لبن حليب محلي.
• ذرة ملح.
• 1ملعقة كبيرة بيكنج بودر.
• 4 أكواب دقيق.
• زيت للقلي.
• 1 كوب كبير شربات.
• 1ملعقة كبيرة جوز الهند.

مقادير الشربات:
• 1/2 كوب سكر.
• 3/4 كوب ماء.
• عصير ليمون.
• فانيليا.

طريقة عمل الشربات:

هنحط السكر والمية كلهم مع بعض في إناء على نار هادئة لمدة ربع ساعة.. بعد كده هنضيف الليمون ونسيبه لمدة 5 دقائق لغاية ما يغلي، بعد كده نحط الفانيليا ونشيله من على النار ونسيبه لغاية ما يبرد.

طريقة عمل الفطيرة:

- هننخل الدقيق ونخلطه مع البيكنج بودر والملح ونضيف إليهم اللبن ونقلبهم مع بعض علشان نحصل على عجينة متماسكة،بعد كده نسيب العجينة لمدة ربع ساعة علشات ترتاح .

- هنرش شوية دقيق على ترابيزة مسطحة ونقوم بفرد العجين بسمك 1سم، ونقطعها على شكل دوائر متساوية ممكن أننا نستخدم فم كوب زجاج علشان نقطع بيه العجينة على شكل دوائر، بعد كده نقليها في الزيت وبعد كده نطلعها ونسقيها بالشربات ونرش عليها جوز الهند.


وبألف هنا وشفا