Saturday 13 June 2009

كل اللي عايزه تعرفيه عن... الكونسيلر


كل اللي عايزه تعرفيه عن... الكونسيلر

أول أداة من أدوات الماكياج اللي ممكن تساعدك في معرفة أسرار التجميل الناجح هي الكونسيلر...

والكونسيلر أو "مصحح العيوب" زي ما فيه ناس بتقول عليه، ممكن تستخدميه لإخفاء أي عيوب موجودة في الوجه، وذلك عن طريق استخدام أصابع اليد في توزيعه، لأن ما ينفعش استخدام الإسفنجة في توزيعه لأنها بتتشربه بسرعة، واوعي تنسي إنك تغسلي إيدك كويس قبل ما تستخدميها في توزيع الكونسيلر على البشرة.

وعلى فكرة فيه ماركات كثيرة أوي للكونسيلر في السوق ممكن تستخدميها، بس أنا بفضل "ماركة "برجوا" أو "فور إيفر" و"مادينا".... ونصيحة مني لو ما كنش عندك كونسيلر وعندك كريم أساس تقيل شويه ماركة "نيفيا" أو "برجوا" أو "كريولان" ممكن تجيبي درجة فاتحة منه، ودرجة غامقة وتستخدميهم كبديل عن الكونسيلر....

مع الكونسيلر كل مشكلة ولها حل


إخفاء الحبوب الحمراء

لو كنت بتعاني من مشكلة ظهور الحبوب الحمراء في الوجه، وعايزة تخفي الحبوب دي.... يبقى استخدمي كونسيلر لونه أخضر، وده عن طريق وضع نقاط خضراء من هذا المستحضر على الوجه أو فوق منطقة الحبوب، وبعد كده تمسحيها كويس باستخدام الأصابع، وبعد كده تستخدمي كريم الأساس لإخفاء اللون الأخضر للكونسيلر، وبكده يبقى أنت أخفيتي تماما الحبوب دي.

إخفاء البقع الغامقة

ظهور البقع الغامقة في الوجه مشكلة بتعاني منها بنات كتير، ويمكن التخلص منها باستخدام كونسيلر أفتح درجة من كريم الأساس، تضعيه الأول على البقع، وبعد كده تضعي كريم الأساس بنفس لون بشرتك بالضبط، وبكده هتخفي أي بقع موجودة في البشرة.

إخفاء الوحمات

أما إذا كان عندك وحمة لونها بني أو أسود أو أحمر... فبيكون تصحيحها بالكونسيلر الأخضر، وبعد كده تحطي كريم أساس أفتح من لون بشرتك، وبعدين كريم أساس لونه أغمق من لون البشرة، أو ممكن تستخدمي كونسيلر على أورنج أو أصفر قبل كريم الأساس؛ بحيث إن الوحمة دي تختفي نهائي.

إخفاء الهالات السوداء

لو عندك هالات سوداء ممكن تخفيها بوضع كونسيلر أبيض أسفل العين، وعلى فكرة الكونسيلر الأبيض بيعطي إشراقة للبشرة الباهتة.

إخفاء احمرار البشرة

مشكلة احمرار البشرة بصفة مستمرة من المشاكل اللي بتعاني منها بنات كتير وخاصة أصحاب البشرة الحساسة، ويمكن التغلب عليها باستخدام الكونسيلر الأزرق، وبعد كده تحطي كريم الأساس عليها، كمان ممكن تستخدمي كونسيلر لونه أخضر للتخفيف من احمرار البشرة والحصول على اللون الوردي.


إخفاء شحوب البشرة

يمكنك التغلب على مشكلة شحوب البشرة، باستخدام الكونسيلر الموف ومن بعده كريم الأساس لإعطاء البشرة الإشراق، كمان فيه كونسيلر لونه أورنج شويه ممكن تستخدميه لإعطاء الحيوية للبشرة الباهتة، أو التي تفتقد اللمعان والبريق، وعلى فكرة ده مفيد كمان للبشرة السودانية.

وفي النهاية أنا دايما بانصح باستخدام الكونسيلر السائل، لأنه مناسب لكل أنواع البشرة بس بشرط إنه
مايكونش خفيف..

No comments: