akalat khafifa

عجة اليبض

دايما الأولاد مش بيحبوا البيض المقلي , و عادة بيرجعوا بالسندوتشات زي ما هي , هقولكم طريقة نعمل بيها البيض تخلي طعمة مختلف و يحبوه

المقادير


• 4 بيضات

• نص كوباية زيتون أسود ( متقطع صغير )

• معلقة بقدونس مقطع صغير ( ممكن نستغنى عنها لو الولاد مبيحبوهوش )

• فلفل رومي مقطع ترنشات صغيرة ( حسب الرغبة و حسي ما تحبيه )

• معلقة زبدة كبيرة ( ممكن زيت زيتون )

• ملح و فلفل و بهارات ( حسب الذوق و اللي انتي بتفضلية )


الطريقة

• نضرب البيض و نضيف ليه الزيتون و القدونس و الملح و الفلفل الأسود و نخلطهم كويس جدا .

• نحط القلاية على النار , و ندهنها زبدو أو زيت زيتون , مقدار قليل جدا , و نحط عليه الفلفل عشان يادوب يشم النار بس و بتحمر حبة صغيرين

• نضيف الخليط بتاعنا و نوطي عليه النار 5 دقايق لحد لما يستوي كويس ,

• نرفعه من على النار و ممكن نضيف ليه مايونيز أو زيتون مقطع صغير على الوش او بقدونس حسب الرغبة

• نقطعة و نعمله للأطفال و ان شاء الله هيعجبهم جدا

بالهنا و الشفا




عجة البطاطس

أكلة فيها قيمة غذائية عالية جدا , و كمان طعمها لذيذ جدا .. و لها طرق كتير جربوا و قولولي ايه رأيكم



المقادير

• 5 بيضات

• 2 بطاطس كبيرة

• بصلة متوسطة

• بقدونس حسب الرغبة ( انا بحط حزمة كاملة )

• ملح و فلفل اسود و بهارات ( حسب الذوق )


الطريقة

• نبشر البصل كويس و نبشر البطاطس و البقدونس , و نضبفهم على بعض و نحط عليهم البهارات و الملح و الفلفل و نقلبهم على بعض كويس جدا ,

• نضيف البيض عليهم و نقلب الخليط كله كويس


• نحط خمس معالق زيت و نسخنهم في القلاية و نضيف مقدار كبشة من الخليط , و نستنى عليها 10 دقايق تقريبا على نار متوسطة لحد لما تحمر و نروح قالبنها على الناحية التانية

• نفس الحكاية برضه على الوش التاني بنسيبها 10 دقايق لحد لما تحمر كويس و مش بنحركها ولا نقلبها خالص عشان تبقا متماسكة

• نفضل نكرر الموضوع دا لحد لما الخليط يخلص

• يا ريت منحاولش نسيب الخليط دا قبل ما نسوية كتير , و كمان منعملوش و نشيلة في التلاجه مثلا عشان تاني يوم , لأنه ممكن يسود عشان البطاطس اللي فيه بتتأكسد



بانية الباذنجان بالصلصة

مش عارفه لو حد جرب الباذنجان البانيه ولا ل , بس هو برضه طريقة حلوة عشان الولاد يحبوا الباذنجان و الكبار كمان لأن فيه فوايد كتير جدا

• 2 باذنجان كبير

• زيت زيتون للقلي و الصلصة

• 2 كوباية بقسماط ناعم

• 2 بيضه

• ملح و فلفل و كمون

• موتزاريلا / جبنة بارميزان او تركي ( رومي) مبشورة

• 4 طماطم مقطعة مكعبات

• بصلة مفرومة

• 2 فص ثوم

• 2 معلقة كبيرة صلصة



الطريقة

• نغسل الباذنجان كويس و نقطعة شرايح و نغليه على النار و نضيف لماء الغلية الملح و زيت الزيتون و نقليه نص سلق مش سلق كامل .

• بعد كدا نحط زيت على النار و نحط عليه البصلة المفرومة و الثوم و نستنى انها يكون لونها ذهبي

• نضيف الطماطم و الصلصة و الملح و الفلفل و نقلب كويس و نستنا عليها تتسبك

• نضرب البيض في طبق و نضيفله الملح و الكمون و رشة فلفل صغيرة

• نغطس الباذنجان بعد لما نخرجه من السلق ( نص سلق ) في البيض و بعد كدا نغطيه بالبقسماط

• نرصه في صينية جنب بعض , و نحط فوق كل واحده من الصلصة اللي عملناها و بعد كدا نحط على كل واحده الجبنة الموتزاريلا و الجبنة الرومي و شوية زيت زتون

• ندخله الفرن ربع ساعه يستوي و هنعرف انه استوي لو دخلنا فيه شوكة هنلاقيها بتدخل و تطلع بسهولة