سلطات مختلفة

سلطة الحمص

فيه كذا طريقة ليها , انا هقول طريقة سهلة و ممكن ننوع فيها

المقادير

• ربع كيلو حمص


• بصلة مبشورة ناعمة

• فصين توم مفرومين

• لمونة كبيرة معصورة

• 2 ثمرة طماطم مقطعة تقطيع صغير

• 2 فلفل رومي او فلفل حراق حسب الرغبة ( مقطع ترنشات )

• معلقتين كبار زيت زيتون

• ملح , فلفل , كمون (نص معلقة)

• 1/4 معلقة بيكربونات صوديوم


أهم حاجه في الموضوع كله النقع بتاع الحمص . انا بنقعه حوالي 12 ساعة ,

• تغسلي الحمص كويس جدا , و تحطيه في حلة فيها ميه و تضيفي البيكربونات و تسبيه 12 ساعة ( من بالليل مثلا للصبح )

• بعد كدا بتغسلية تاني كويس جدا , و تحطيه في حله و تغطيه بالمية و تحطيه على النار تكون متوسطة , لحد لما يغلي , و أول ما يغلي توطي عليه عشان يستوي .. ( متسبهوش يستوي أوي و الأحسن ان كل حمصة تكون متماسكة و ميفرولش)

هنا باه فيه طريقتين للسلطة ,

1. الطريقة الأولي :

• نحط الحمص على البصل والفلفل الأخضر و الطماطم و نخلطهم كويس

• نخلط التوم و الزيت و اللمون و الملح و الكمون و الفلفل الأسود و نضيف الخليط دا على خليط الحمص

• بيتقدم بارد أو سخن حسب ما تحبيه


2. الطريقة التانية :

• نحط الزيت و التوم و البصل على النار لحد لما يبقا لونهم دهبي , و بعد كدا نضيف لهم الطماطم و اللمون و الكمون و الملح و الفلفل الأسود

• نضيف الغليط على الحمص و نحط الفلفل للتجميل


فيه اضافات كتير للسلطة دي

1. ممكن اجيب قطعتين توست و اقسمهم مربعات صغيرة و احطهم في عصير اللمون و اضيفهم للخليط

2. ممكن معلقة مايونيز مضاف لها اعواد كرفس و بقدونس تضاف من فوق

3. ممكن علبة زبادي تضرب لحد لما تبقا ناعمة و يضاف لها بقدونس مقطع صغير و حبة ملح صغيرين و تتحط على الوش

بطاطس بالمايونيز

السلطة دي طعمها لذيذ , و كمان ممكن ننوع فيها كتير أوي , انا هقولكم على طريقتها و ممكن تضيفوا براحتكم

المقادير

4 حبات بطاطس

4 معالق كبيرة مايونيز

حزمة بقدونس مفروم

ملح / فلفل

زيت زيتون

عصير ليمون

زيتون مقطع

الطريقة

نقطع البطاطس مكعبات و نقليها في الزيت ( ممكن نسلقها الول و بعد كدا نقليها عشان متبقاش لونها احمر أوي من القلي )

نخلط البقدونس و المايونيز و الزيتون و الملح و الفلفل و اللمون مع بعض

نصب الخليط على البطاطس و بتتقدم سخنه . بالهنا و الشفا

سلطة بابا غنوج

المقادير

2 باذنجانة كبيرة

كوباية زبادي

3 فصوص ثوم مفرومين

ملح / فلفل اسود / ليمون / ملعقة زيت / ممكن طحينة و مايونيز للي يحب برضه

الطريقه

نحط الباذنجان في الفرن و نسيبه لحد لما يتشوى , بنعرف انه اتشوى من ريحته و كمان لو حطينا فيه شوكه هتدخل و تطلع بسهولة يبقا كدا معناه انه استوى
فيه طريقه لإضافة نكهة مميزة قبل لما نشويه ننقعه في ميه و ملح و شطة و فلفل و ليمون , و نخرم الباذنجان عشان يتشرب الميه بالنكهة بتاعتها و بيدي نتيجه حلوة اوي

بعد لما يتشوى بنقشرة و نحطه في طبق و نحط عليه الإضافات بتاعتنا كلها ., و نهرس الخليط كله لحد لما يوصل للقوام اللي نحبه

ممكن نضيفله مايونيز او طحينة مع عيدان كرفس , و كمان ممكن نضيف نص معلقة كريمة , بتبقا تحفه , و بالهنا و الشفا

سلطة التومية

التومية ليها كذا طريقة , و كل طريقة لها طعم مختلف , انا هستبعد الطريقة اللي فيها البيض , عشان المشاكل اللي على البيض دلوقتي لأن اللبيض فيها بيكون مش مستوى .
هتكلم على طريقتين سهلين جدا , واحدة بالزبادي و واحدة بالبطاطس

الطريقة الأولى

المقادير

• 3 حبات بطاطس متوسطة

• 5 فصوص توم

• معلقة مايونيز كبيرة

• ملح و فلفل أبيض ( حسب الرغبة)

• لمونتين معصورين ( ممكن نزود أو نقلل حسب كل واحد بيحب ايه )

• معلقة زيت زيتون


الطريقة :

• طبعا بنغسل البطاطس كويس جدا و بعد كدا بنقطعهم شرائح و بنحطهم في حلة ميه على النار و نققشر فصوص التوم و نحطها عليه

• ناخد بالنا من نضافة البطاطس لأننا هنستخدم مية السلق بتاعتها , يا ريت يا جماعة محدش يتهاون في نضافة أي حاجه لأن دا أكل بيدخل جوة الجسم .

• بعد لما الميه تغلي و البطاطس تتسلق , نصفيها و ناخد البطاطس و الثوم و نحتفظ بالميه على جنب

• نحط البطاطس و الثوم في الخلاط و نضيف ليهم المايونيز و عصير الليمون و و الملح و الفلفل و معلقة الزيت و نخلطهم في الخلاط , و نضيف من الميه بتاعت السلق عليهم عشان نحدد كثافة التومية

• حسب الرغبة بتاعت كل واحد , فيه ناس بتحبها سايلة و في ناس بتحبها متماسكة شوية , أنا عن نفسي بنصح يكون قوامها زي الطحينة , بتكون لذيذة و ليها نكهة مميزة في القوام دا .

• بعد كدا بنحطها في التلاجه يوم واحد , و بتتقدم باردة .

• ممكن نحط على الوش ورق كرفس صغير للتجميل و بالهنا و الشفا




الطريقة التانية :

المقادير

• 3 علب زبادي

• 2 فصوص توم

• معلقتين مايونيز

• ملح و فلفل أبيض حسب الرغبة


الطريقة :

• بنحط كل المقادير على بعض , و ممكن يكون الثوم مفروم من الأول

• نضربهم كلهم في اخلاط بس مش كتير , أو الأحسن نضربهم بالمضرب اليدوي

• بتتقدم ساقعة , و ممكن نضيف كرفس للتجميل , بالهنا و الشفا