وجبات كاملة للمبتدئات

الغداء النهاردة هيبقا حاجه تقليدية و بسيطة

• أرز بالشعرية
• طبق خضار باللحم ( الكوسة )
• بطاطس مقلية
• طبق السلطة

دي وجبة سهلة و خفيفة ممكن تتعمل في وقت قصير و لها قيمة غذائية كمان , و تنفع كتير أوي في أوقات ما يكون عندي زحمة وقت راجعة من الشغل أو في وسط الأسبوع


في أساسيات انا بمشي عليها دايما , و بنصح أي حد يعمل زيي

• أول حاجه بتأكد ان عندي كل المقادير اللي هستخدمها في الأكل , و ببدأ كمان أني اعيرها , عشان مجيش في النص و أقف و اضيع وقت

• أي حاجه بستخدمها لازم أغسلها كويس جدا , و دي مبادئ للنظافة العامة طبعا , حتى لو أنا كنت غاسلاها و مخزناها قبل كدا , و حتى الأدوات اللي بستخدمها بغسلها الأول قبل ما استخدمها حتى لو أنا غسلاها

• دايما لما ببدأ الطبيخ مبحبش اكون مضايقة أو مشغولة بحاجه تانية , بيكون تركيزي كله في المطبخ , لأن كل ما تركيزك بيقل كل ما الأكل بيطلع مش حلو , دا عشان انتي بتكوني معندكيش حرص على الأكل .

• عدم الإستعجال و الصبر على كل حاجه و أني ادي كل شئ وقته , و مزهقش و مستعجلش خصوصا و الأكل على النار , لأن دي اخطر مرحلة و التسوية على النار هي النتيجة النهائية , و فيه بنات كتير بيكلموني انهم بيعملوا كل الخطوات اللي بقولهم عليها صح و الأكل بيطلع مش حلو . السبب بيكون التسوية على النار دايما بتكون يا إما ناقصه يا إما مش كاملة .

• لازم تعتمدي و تثقي في ذوقك انتي . ممكن اقولك الأكل محتاج معلقة صغيرة ملح , لكن انتي تلاقي المعلقة مش كفاية يبقا انتي زوديها لحد لما تلاقي الطعم مظبوط . أهم حاجه انك تكوني واثقه في نفسك و كمان متابعة الي بتعملية كويس


هنبدأ بالأرز

• طبعا بنتأكد زي ما قلت ان كل حاجه موجودة .. الأرز مع انه ساهل جدا لكنه مشكلة بالنسبة لبنات كتير , و دايما بيشتكوا انه مش بيطلع بجودة كويسة , انا هقولكم على طريقة سهلة للأرز

• الأول بحدد المقدار اللي عندي , يعني مثلا انا هعمل اكل يكفي 4 أفراد , بعتبر ان كوباية أرز لكل فرد كفاية , يعني عندي مقدار مكون من 4 كوبايات أرز . يبقا انا كدا عرفت هحط مقدار مية قد ايه ( 4 كوبايات ميه )
• دايما مقدار الميه بيكون قد مقدار الرز

• الشعرية , في العادي نص كوباية شعرية بتبقا مقدار كويس جدا لناس كتير , بس فيه ناس مش بتحب الشعرية في الرز كتيرة و فيه ناس بتحبها كتير , كل واحد و ذوقة , بس نص كوباية مقدار كافي جدا .

• تلاته (3 ) معالق كبيرة زيت , عشان التحمير ..

• ملح و فلفل .. معلقة و نص صغيرة ملح , دا مقدار كافي بالنسبة ليا أنا .. ممكن تزودي لو حد بيحب الملح اكتر من كدا شوية أو أقل .. الفلفل حسب الطلب , فيه ناس مش بتحبة في الأرز , اللي عاوزة تحط يبقا رشة صغيرة عشان تدي طعم بس

طريقة العمل

• بجيب الحلة و أحطها على النار و أحط مقدار الزيت بتاعي , و استنى لما الزيت يقدح .

ازاي بتعرفي ان الزيت قدح ؟

لون الزيت بيبقا أفتح شوية و كمان ريحته بتكون اتغيرت لأن فيه مواد متطايرة طلعت منه . و بتبصي على حروف الزيت هتلاقيها مبقتش لزجه و متماسكة زي ما هي طبيعة الزيت لكن هتلاقيه اصبح زي الميه و مش متماسك .. و اللي مش هتعرف كدا مكن تستنى 4 دقايق على نار متوسطة و بعد كدا الزيت هيكون قدح .. لكن حاولي تجربي مره و تميزي الفرق بنفسك زي ما قلتلك .

• بحط مقدار الشعرية بتاعي على الزيت و ببدأ اقلبة دقيقتين او تلات دقايق لحد لما الاقي الشعرية طلعت ريحة مميزة , و لونها أصبح اغمق شوية .
• التقليب مهم جدا لازم تحركي الشعرية جوا الزيت عشان تضمني ان كل الشعرية اللي حطيتيها استوت في الزيت

الناس اللي مش هتحب تحط شعرية خالص , ممكن تحط مقدار من الرز , معلقتين رز و تقلبهم في الزيت لحد لما لون الرز يتغير و يبقا دهبي غامق , يبقا كدا معناه انه استوى

• بحط مقدار الميه بتاعي , و اللي بيساوي دايما مقدار الأرز و بضيف في الخطوة دي الملح و الفلفل و بقلبه و بستنى لما الميه تغلي عشان ابدأ في اضافة الأرز

• بجيب الرز بتاعي ( بيكون مغسول طبعا و دي حاجه من الأساسيات اللي قلناها فوق ) و بحطه في الميه بعد لما تغلي , و استنى على الأرز لحد لما يتشرب كل الميه بتاعتة و اوطي النار عليه عشان يبدأ يستوي

ازاي اعرف ان مقدار الميه بتاعي مناسب للرز ؟

طبعا المفروض بتكوني عاملة المعيار من الأول صح , و فيه طريقه عشان تتأكدي , تجيبي معلقة و توقفيها في نص الحلة , هتلاقي واقفه و متوازنة و مش بتقع . دي بتأكدلك ان المقدار صح .. لكن لازم تتأكدي انتي من الأول .

ازاي اعرف ان الرز شرب ميته عشان أوطي عليه ؟

دي اهم حاجه و ناس كتير بيبوظ منها الرز في الخطوة دي , يا اما يطلع معجن عشان مبيكونش شرب ميته يا اما يطلع ناشف عشان بيكون شربها و لسه النار عالية , أول ما الميه بتنزل من على وش الرز ببدأ اوطي عليه , بيبقا صوت الميه لسه موجود , و بيبقا الرز من فوق مندي و كأنه عليه زيت , لازم تتابعي كويس و تصبري على الرز في الخطوة دي لأن عليها عامل كبير أوي من نجاح الرز

• بستنى حوالي 15 ل 20 دقيقه عشان يستوي الرز و أنا موطية النار عليه خالص , بيبان من ريحة الرز انه استوى , و برضه لازم تثقي في ذوقك انتي , و تذوقي الرز و تشوفيه هل استوى ولا لأ
• و بالهنا و الشفا :)



طبق الخضار باللحم


فيه طرق كتير لعمل الخضار باللحم , اللي انا هقولة طريقه سهلة و بسيطة و صحية جدا .

• بتأكد ان عندي المقادير بتاعتي و هي : كيلو كوسة مغسولة كويس جدا و مقطة ترنشات – كيلو لحم مقطع مكعبات – صلصة طماطم ( دي هشرحها بتتعمل ازاي ) - بصلة مفرومة – ملح و فلفل – 5 معالق زيت

• بحط الحلة على النار و احط مقدار الزيت بتاعي و استنى انه يقدح (ببص على لون الزيت و كمان على قوامة بيكون مش متماسك فبعرق انه قدح )

• بحط البصلة و استناها تحمر مع التقليب

ازاي اعرف ان البصلة استوت ؟

طبعا بتكوني بتقلبيها و متنسهاش على الناش عشان كل البصل ياخد سوا زي بعض , هتلاقي البصلة في الأول بدأت تكرمش و بعد كدا لونها بيتغير للدهبي , أول ما توصل للون دهبي و تبدأي تشمي ريحتها تعرفي انها استوت , متستنيش على البصلة لأن بتتحرق بسرعة , لازم تتابعيها كويس و زي ما قلنا أهم حاجه الأكل و هو على النار لأنه دقايق بسيطة ممكن تفرق في الأكل .

• أول ما البصلة تحمر ببدأ اني احط اللحم , مع التقليب . هتلاقي اللحم لونه اتغير . اول ما كل اللحم لونه يتغير ( 5 دقايق مع التقليب ) ابدأ في اضافة الكوسة

• اقلب الخليط كله على النار , التقليب مهم جدا , هتلاقي في كل مرحلة ريحة الأكل بتتغير و دا معناه انك ماشية صح , لأن الطريقة اللي بقولها دي بتخلي كل الأكل يمتزج ببعضه و يدي طعم ختلف .

• بعد دقايق من التقليب سيبي الخليط على النار الهادية لمدة 5 دقايق و غطية , هتلاقي اللحمة بدأت تنزل الميه بتاعتها و لون الكوسة اتغير و اصبح غامق (ممكن تضيفي شوية فلفل عشان تدي طعم مميز لو بتحبي الفلفل)

دلوقتي هنعمل الصلصة في الخمس دقايق اللي هنسيب فيهم الخليط على النار ينزل الميه بتاعته و متنسيش نار هادية عشان الأكل ميتحرقش :)

بجيب 6 حبات طماطم , و اقطعهم على 4 و احطهم في الخلاط و اخلطهم مع نصف كوباية ميه

خلي بالك ان الميه مهمة جدا , نص كوباية كفاية أوي عشان متخليش الصلصة سايبه و لو قللتي الميه الصلصة هتبقا لزجه جدا

• طبعا الخليط دا معمول عشان يتحط على المقدار اللي على النار , بروح بعد لما الخمس دقايق يعدو و اصب الخليط دا على اللي على النار , احيانا بتلاقي ان الخليط كله محتاج مقدار من الميه , زودية لكن بحرص , يعني بالكتير نص كباية مية و بتسيبي الخليط كله على النار الهادية لمدة 20 دقيقه , هتلاقي انه بيبدأ في الغليان .

• أول ما يبدأ يغلي بتضيفي الملح و الفلفل , نص معلقة كبيرة ملح ( المقدار بتاعي و كل واحد ممكن يقلل و يزود حسب ما هو محتاج )
• و تعلي عليه النار عشان الصلصة تتسبك مع الخليط .

ازاي أعرف ان دا الوقت المناسب اني اعلي النار على الأكل ؟

الصلصة اللي ضيفناها هيكون قوامها بقا سايب خلاص و لونها هيكون اتغير و الخليط كله هيكون امتزج مع بعضه , كمان ممكن تجربه بالشوكة و تحطيها في اللحمة أو الكوسة . عشان تتأكدي انها استوت او قربت تستوي و خلاص محتاجه بس انك تعلي عليها النار

• بتستني 10 دقايق تقريبا و النار عالية ( أو حسب تذوقك انتي و تقديرك هل الأكل استوى ولا محتاج لسه شوية ) و بعد كدا بتطفي النار و بالهنا و الشفا :)

في الوقت اللي بيكون فيه الكوسة و الرز بيستوى , 20 دقيقه تقريبا , ممكن اكون قطعت الطماطم و الخضروات للسلطة , و كمان اكون طلعت البطاطس من الفريزر و بدأت اقليها , طبعا منصحش المبتدئات في تعلم الطبخ انهم يعملوا كدا , لأن دا ممكن يخليكي تتشتتي و متركزيش , لكن دي بس حاجه و نصيحة لاختصار الوقت للمحترفات :)


فراخ مخلية مشوية بطريقة جديدة

الطريقة دي لو عملتوها صح هتعجبكم أوي

المقادير

كيلو صدور فراخ مخلية

ملح و فلفل و بهارات

فص ثومة مبشورة

بصلة مبشورة

3 حبات طماطم


الطريقة

نغسل الفراخ كويس بالخل و الليمون و نتبلها بالبصل و الثوم و الملح و الفلفل و البهارات و نسيبها لمدة ساعة على الأقل في التلاجه مع التتبيلة

نحط الطماطم في الخلاط و معاها ربع كوب ميه و ثومة مبشورة و ملح خفيف و بهارات

نفرد الفراخ في صينية و نحطها في الفرن و نصب عليها العصير بتاع الطماطم و نسيبها لحد ما تستوي

نرفعها لفوق عشان وشها يحمر و تتحرق الصلصة على الوش

نطلعا و نزينها بالفلفل الروم و حلقات الطماطم و عيدان الجرجير و الخس



طريقة عمل اللحمة الباردة)

المقادير

عرق لحم ( نطلبه من عند الجزار حسب الوزن اللي عاوزينة )

خيط الجزار ( نطلبه من عند الجزار برضه )

8 فصوص ثوم ( ممكن نزودهم حسب الطلب)

3 معالق كبيرة سمنة

ملح / فلفل اسود / بهارات / حبهان

خضار مختلف ( جزرة مقطعة / بطاطس مقعة / بازلاء / اي خضار تحبي تضيفيه )

الطريقة

نخرم اللحمة في اماكن مختلفة بطرف السكينة و نحط في الأماكن دي فصوص الثوم (ممكن نتبل التوم بملح و فلفل الأول)

في نفس الأماكن اللي حطينا فيها الثوم ممكن نحط الحبهان , بس يفضل منكترش من الحبهان

نلف اللحمة بخيط الجزار ( فيه ناس بتلفها بدوبار , بس خيط الجزار أحسن لأنه حاجه طبيعية و هتدي طعم لذيذ)

بعد لما نلف اللحمة كوس بحيث ان الثوم ميطلعش ولا يقع منها نبدأ نسخن السمنه في قلاية غويطه و نحط فيها عرق اللحمة

نبدأ في الأول نشوح اللحمة , نقلبها على كل جنب لحد لما كلها تتشوح , بعد كدا نغطيها 10 دقايق لحد لما تبدأ تنزل الميه بتاعتها

نحط قطع البطاطس و الجزر و الخضار , بس منحطش كتير , عشان يستوي كويس , يعني مجرد قطع قليلة و بسيطة تضيف طعم بس

نضيف الملح و الفلفل بتاعنا و البهارات

نبص عليها كل شوية و نقلبها يمين و شمال , و كل ما تشرب الميه بتاعتها نضيف شوية ميه من عندنا ( الميه تبقا دافيه شوية مش من الحنفية )

نختبر اللحمة كل شوية بالشوكة , اول ما نلاقي سواها بقا كويس نشيلها من على النار ( بتاخد تقريبا 45 دقيقه على النار )

أول ما تستوي , نرفعها و نصفيها من الصوص بتاعها , و نستنا انها تبرد و نقطعها شرائح (ممكن بعد لما نطلعها من النار نحطها في الفرن فوق 5 دقايق على الشواية العلوية عشان وشها ينشف و يتحمر , بس دي حاجه اختيارية )

بنحطها في اطباق و نصب عليها من الصوص و نحط حواليها البطاطس و الجزر و الخضار اللي كان معاها

التجميل ممكن بحلقات فلفل و خس و كابوتشي



طاجن رز باللحم

متهيألي كلنا بنحب طاجن الرز باللحم .. دي طريقه حلوة و سهلة ليه و هتعجبكم


4 كوبايات رز

بصله كبيرة مفرومة

نص كيلو لحم مكعبات

ثوم / كملح / فلفل

8 كوبايات شوربة

معلقتين سمنه


الطريفة

نغسل الرز و نصفيه كويس

نحط قلاية على النار و نحط الشسمن و نضيف له اللحم و البصل و الثوم و نقلبه لحد لما البصل يحمر و اللحمه كمان تحمر كويس

ندهن طاجن بالسمنه أو الزبده و نحط فيه الرز و اللحمه و نضيف بعد كدا الشوربة و الملح و الفلفل

نسيبه على نار هاديه في الفرن لحد لما يستوي اللحم و يشرب الميه