Sunday 24 May 2009

إزاي ممكن إنك تتألقي في صيف 2009

بنات كتير بيحبوا يلبسوا جوبات؛ بس للأسف الشديد بتقابلهم مشاكل في لبسها، علشان كده قررنا النهارده إننا قبل ما نتكلم عن موضة الجوبات نتكلم عن المشاكل دي، ونقدم الحل المفيد....

المشكلة الأولى




فيه بنات جسمها مليان، وبتحس إنها لما بتلبس الجوب إن جسمها بيظهر بحجم أكبر من حجمه الطبيعي!!!

وعلاج المشكلة دي هو إنك تختاري الجوبات الضيقة من فوق ونازلة على واسع من تحت، وتبعدي في اختيارك عن الجوبات الكلوش أو الواسعة، كمان ياريت تختاري الجوبات السادة، وتبعدي نهائي في اختيارك عن الجوبات اللي فيها نقوش ورسومات كتيرة، لأنها فعلا هتديكي إحساس بأن حجمك أكبر مما أنت عليه، وبلاش تختاري الجوبات اللي فيها جيوب كتير لأنها مش مناسبة لطبيعة جسمك.

المشكلة الثانية




والمشكلة دي على عكس المشكلة الأولى، وهي إن فيه بنات جسمها رفيع أوي، ولما بتلبس جوب بتحس إنها رفيعة أوي، والجوب مش مضبوطة عليها!!!

علشان كده بقولك إن لو كان جسمك رفيع يبقى ياريت تختاري الجوبات الكلوش، وتبعدي نهائي في اختيارك عن الجوبات الصك أو الضيقة من فوق ونازلة على واسع من تحت لأنها مش مناسبة ليكي، واختاري جوبات برسومات ونقوش كتيرة.

المشكلة الثالثة




فيه بنات تانية مابتعرفش تختار البلوزة المناسبة للجوب!!!

ودي مشكلة بسيطة جدا حلها إنك تلبسي بلوزة قصيرة ينتهي طولها عند نهاية الأرداف، كمان ممكن تلبسي توينز صيفي، وطبعا لازم تاخدي بالك إن لون البلوزة أو التوينز يكونوا مناسبين إلي لون الجوب.

بالنسبة لموضة الجوبات في صيف 2009

يتميز صيف 2009 بوجود جوبات بتصميمات متنوعة من حيث القصات، أو نوعية القماش فهتلاقي...

الجوب الكلوش الأبيض في أسود، مع جوب زي دي ممكن تلبسي بلوزة لونها إما أبيض أو أسود.



الجوب السادة الموجود عليها بعض من الشغل البسيط، مع شكل زي ده لازم تختاري بلوزة من نفس لون الشغل الموجود على الجوب.



جوب كلوش بمجموعة متداخلة من الألوان المميزة للصيف، مع الشكل ده ممكن تلبسي بلوزة ملونة بأي لون من الألوان الموجودة في الجوب.



جوب كحلي سادة وبها نقوش في طرف الجوب، مع الشكل ده هتحتاجي تلبسي بلوزة من نفس لون الجوب نفسها أو من نفس لون النقوش الموجودة على الجوب، أو ممكن تلبسي بلوزة منقوشة بنفس الألوان الموجودة على الجوب.


جوب شيفون بمجموعة متداخلة من النقوش، يفضل معها لبس بلوزة سادة لونها يكون لون أي نقشة من النقوش الموجودة على الجوب.



ده كمان شكل جديد ممكن تجربيه في صيف 2009 بس على فكرة الشكل ده مناسب للبنت اللي جسمها رفيع.





وزي ما كانت الجوب البيضاء موضة في صيف 2008 فهي كمان موضة في صيف 2009، وعلى فكرة مهم أوي أن يكون عندك جوب بيضاء لأنها بتديكي حرية في اختيار بلوزة بأي لون.


ده كمان شكل لجوب بيضاء بها بعض من النقوش البسيطة هتديكي إحساس بالأناقة.





ده كمان شكل لقصة جديدة للجوب الشيفون


أما البنات اللي بيحبوا الجوبات القصيرة فده شكل الجوب القصيرة في صيف 2009





كمان الجوب الجينز لسه محتفظة بشياكتها في صيف 2009

البنطلونات

ودلوقتي بعض مع تعرفنا على موضة الجوبات
تعالي نتعرف على إيه الجديد في موضة البنطلونات؟!



البنطلونات القماش


بالنسبة للقماش

هتلاقي عندك بنطلونات قماش بخامات متعددة زي الكتان؛ وإن كنت مش بنصح بشراء البنطلونات الكتان لأنها بتتكرمش بسرعة، كمان فيه خامات تانية زي الكريب والليكرا.

بالنسبة للتصميمات

هتلاقي تصميمات كتير أوي زي مثلا البنطلونات الواسعة اللي بتناسب البنت اللي جسمها مليان والرفيعة، كمان فيه البنطلونات الضيقة من فوق ونازلة على واسع من تحت، ودي بتناسب البنت اللي جسمها متناسق والرفيعة، وعلى فكرة البنطلون الباجي والبرمودا موضة في صيف 2009.

بالنسبة للألوان

هتلاقي إن كل الألوان موضة، بس طبعا لو كان جسمك مليان يبقى اختاري الألوان الغامقة زي البني والأسود والبيج، لكن لو كان جسمك رفيع أو متناسق يبقى اختاري الألوان الفاتحة زي الأبيض والبيستاج... وعلى فكرة البنطلون المقلم بخطوط طولية موضة في صيف 2009، وده مناسب جدا للبنت ذات القامة القصيرة.

البنطلونات الجينز






فدي محتاجة منك شوية عناية في الاختيار، ودي شوية نصايح هتساعدك على اختيار اللي يناسبك وهي:

لو كان لك كرش

يبقى ابعدي تماما عن البنطلونات الجينز اللي ليها وسط ساقط علشان دي بالذات هتبين امتلاء منطقة البطن.

لو كنتِي رفيعة أوي

يبقى ابعدي نهائيا عن الجينز اللي بوسط مرفوع علشان ده هيظهرك أرفع من اللي أنتِ عليه. كمان ابعدي نهائيا عن الجينز الغامق واختاري الألوان الفاتحة.

لو كنتِي صاحبة أرداف عريضة

يبقى يناسبك جينز عادي، ويكون لونه غامق، وكمان ابعدي نهائيا عن التصميمات اللي فيها جيوب خلفية، لأن دي بالذات هتعطي حجما أكبر مما أنت عليه.

ودي مجموعة مميزة من البنطلونات القماش والجينز
هتساعدك على الاختيار


ولغاية هنا وخلص كلامنا النهارده

No comments: